លក្ខណៈនៃ PHP Hypertext Preprocessor
PHP មាននាទីសំរាប់បង្កើតកម្មវិធីទៅឲ្យគេហទំព័រ ដែលធ្វើឲ្យគេហទំព័រមានលទ្ធភាពទាក់ទងជាមួយនឹងទិន្នន័យ នាំឲ្យគេហទំព័រមានភាពប្រែប្រួលទៅកាលៈទេសៈដែលបានកំណត់ ។
អ្នកសិក្សា
មេរៀននេះត្រូវបានរៀបចំឡើង សំរាប់អ្នកសិក្សា ដែលចង់បង្កើតកម្មវិធីទៅឲ្យគេហទំព័រ ធ្វើឲ្យគេហទំព័រមានទិន្នន័យប្រែប្រួលទៅតាមលក្ខខណ្ឌផ្សេងៗ ។
តម្រូវការ
អ្នកសិក្សាមេរៀននេះ គឺតម្រូវឲ្យចេះកូដ HTML ជាមុនសិន ។ បើអ្នកមិនទាន់ចេះកូដ HTML ទេ អ្នកអាចសិក្សាមេរៀន HTML ដោយចូលទំព័រ មេរៀន HTML ។
- ពាក្យពេញនៃ PHP គឺ PHP Hypertext Preprocessor ។
- PHP គឺជា Server Side Script មានន័យថា ជាកូដដែលដំណើរការលើ Server ។
- PHP ប្រើជាមួយនៃ HTML ផ្ទាល់តែម្ដង ។
- MySQL គឺជាកម្មវិធីគ្រប់គ្រងទិន្នន័យមួយដ៏ពេញនិយម ហើយវាត្រូវបានដាក់បញ្ចូលរួចជាស្រេចនៅក្នុង PHP ។
- PHP មានលទ្ធភាពគ្រប់គ្រាន់សំរាប់បង្កើតបណ្ដាញសង្គម (Facebook ដំបូងឡើយ ក៏បង្កើតដោយ PHP ដែរ) ។
- PHP គឺសាមញ្ញគ្រប់គ្រាន់ សំរាប់អ្នកសិក្សាកូដ Server Side ជាលើកដំបូងធ្វើការសិក្សា ។
- PHP អាចដំណើរការលើប្រព័ន្ធប្រតិបត្តិការជាច្រើនដូចជា Windows, OS X, Linux ។
បម្រើបម្រាស់ PHP
- PHP អាចបង្កើតជាលក្ខខណ្ឌទៅឲ្យគេហទំព័រ ដើម្បីឲ្យគេហទំព័របង្ហាញលទ្ធផលផ្សេងៗទៅតាមលក្ខខណ្ឌទាំងនោះ ។
- PHP អាចបង្កើត អាន លុប និងកែតម្រូវឯកសារ ក៏ដូចជាទិន្នន័យ នៅលើ Server ។
- PHP អាចចាប់យកព័ត៌មានដែលអ្នកប្រើប្រាស់បញ្ចូនមក ។
- PHP អាចបញ្ជូន និងចាប់យក Cookies ។
អ្នកបង្កើត PHP
PHP ត្រូវបានបង្កើតឡើងដោយ Rasmus Lerdorf នៅឆ្នាំ 1995 ។
កំណែទម្រង់ PHP
| កំណែទម្រង់ | ឆ្នាំ |
|---|---|
| PHP | 1995 |
| PHP 2 | 1997 |
| PHP 3 | 1998 |
| PHP 4 | 2000 |
| PHP 5 | 2004 |
| គ្មាន PHP 6 | |
| PHP 7 | 2015 |
កម្មវិធី
ក្នុងដំណើរការ PHP មានកម្មវិធីចំនួន ៥ ដែលតែងតែមាន
- កម្មវិធីសរសេរកូដ សំរាប់សរសេរកូដ
- កម្មវិធីរុករកគេហទំព័រ សំរាប់ដំណើរការគេហទំព័រ
- PHP parser សំរាប់បកប្រែ PHP
- Web server សំរាប់ឲ្យ PHP ដំណើរការពីលើ
- ទិន្នន័យ សំរាប់ផ្ទុកទិន្នន័យ ។
សំរាប់កម្មវិធីសរសេរកូដ និងកម្មវិធីរុករកគេហទំព័រ យើងមានវារួចហើយ នៅក្នុងមេរៀន HTML ។ ដូចនេះ កម្មវិធីដែលយើងត្រូវការមាន PHP Parser, Web Server និងទិន្នន័យ ដែលយើងត្រូវទាញយកវាដាច់ដោយឡែកពីគ្នា ។ ប៉ុន្តែ ដោយរាល់ពេលដែលធ្វើការជាមួយនឹងកូដ PHP យើងចោលរបស់ទាំងនោះមិនបាន ដូចនេះ មានកម្មវិធីមួយចំនួន ដែលមានផ្ទុកកម្មវិធីទាំងអស់នោះនៅក្នុងនឹងតែម្ដង ។ កម្មវិធីនោះមាន ៖
- សំរាប់ Windows : កម្មវិធី Wamp
- សំរាប់ OS X : កម្មវិធី Mamp
- សំរាប់ Linux : កម្មវិធី Lamp
- គ្រប់ប្រព័ន្ធប្រតិបត្តិការ : កម្មវិធី Xampp
ដំណើរការ
ក្នុងមេរៀន ខ្ញុំជ្រើសរើសយកកម្មវិធី Xampp មកដំណើរការកូដ PHP ។ ដើម្បីធ្វើការសាកល្បងកម្មវិធី ថាវាដំណើរការឬមិនដំណើរការ យើងត្រូវបើកកម្មវិធីនោះ ហើយចុច Start នៅជួរជាមួយនឹង Apache ។ បើ Apache វាចេញពណ៌បៃតង បានសេចក្ដីថា វាដំណើរការត្រឹមត្រូវ ។
ឯកសារ PHP ត្រូវបញ្ចប់ដោយ .php ។ ដើម្បីឲ្យឯកសារ PHP ដំណើរការ យើងត្រូវយកឯកសារទាំងអស់នោះ ដាក់នៅក្នុង Folder នៃ Web Server ដែលដំណើរការដោយកម្មវិធី Xampp ដែលយើងកំពុងប្រើ ។ Folder នៃ Web Server នៃកម្មវិធី Xampp គឺជា Folder htdocs ដែលជាទូទៅស្ថិតនៅ
- Windows : C:…\xampp\htdocs
- OS X : Application/xampp/xamppfiles/htdocs
- Linux : /opt/xampp/htdocs
ដើម្បីដំណើរការឯកសារដែលនៅក្នុង htdocs យើងត្រូវចូលទំព័រ localhost នៅលើកម្មវិធីរុករកគេហទំព័រ ។ ហើយតាមធម្មតា វានឹងដំណើរការឯកសារ index, home ឬ default ដោយស្វ័យប្រវត្តិ ។
