ជំនាញទន់ឬ Soft Skill គឺពិតជាមានសារសំខាន់ក្នុងការទទួលបានជោគជ័យនៅក្នុងសតវត្សទី២១។ ជាទូទៅ អ្នកដឹងយ៉ាងច្បាស់ថាជំនាញរឹងត្រូវបានគេបង្រៀននៅឯសាលារៀន។ អ្វីដែលអ្នកប្រហែលជាមិនចាប់អារម្មណ៍នោះគឺ សាលាក៏មានបង្រៀនអ្នកផងដែរពីជំនាញទន់ខ្លះៗ ប៉ុន្តែមិនច្រើននោះទេ។ ឧទាហរណ៍ គ្រូដាក់ការងារជាក្រុម ហើយនៅពេលមានជម្លោះរវាងសមាជិកនៅក្នុងក្រុម អ្នកត្រូវដោះស្រាយតាមវិធីសាស្ត្រផ្សេងៗ។ ការដោះស្រាយនេះហើយតម្រូវអោយអ្នកមានជំនាញទន់។ ខាងក្រោមនេះគឺជាជំនាញទន់ដែលអ្នកត្រូវការជាចាំបាច់បំផុតក្នុងវិស័យការងាររបស់អ្នកមិនថានៅទីណា ប្រភេទការងារអ្វីក៏ដោយ៖
១. ជំនាញទំនាក់ទំនង៖
វាសំដៅទៅលើជំនាញក្នុងការបញ្ចុះបញ្ចូលអ្នកស្ដាប់អោយជឿនូវអ្វីដែលយើងនិយាយ។ ប្រសិនបើអ្នកមានជំនាញនេះនៅក្នុងខ្លួន អ្នកនឹងមានសក្ដានុពលផ្នែកចរចា។ បើអ្នកជាអ្នករកសុី ជំនាញនេះរឹតតែសំខាន់ ព្រោះទំនាក់ទំនងល្អគឺអាចថែរក្សាអតិថិជនរបស់អ្នកបានរីកចម្រើន ដែលជាមូលដ្ឋានទ្រព្យរបស់អ្នក។
២. ជំនាញក្នុងការធ្វើការជាក្រុម៖
ធ្វើការនៅទីណាក៏ដោយ គេចមិនផុតទេធ្វើការជាក្រុម។ និយោជកជាទូទៅចង់បានបុគ្គលិកជាអ្នកដែលមានសមត្ថភាពក្នុងការធ្វើការជាក្រុម ដែលអាចធ្វើអោយមានប្រសិទ្ធិភាពក្នុងការបំពេញការងារ។ ក្នុងមុខជំនួញអាជីវកម្ម វាក៏មានសារៈសំខាន់ផងដែលក្នុងការបំពេញការងារក្នុងនាមជាសហស្ថាបនិក ឬធ្វើការជាមួយនឹងភាគីដៃគូនាៗ។ បើអ្នកបើកការរកស៊ី អ្នកត្រូវចេះគ្រប់គ្រងបុគ្គលិកធ្វើការក្រោមអ្នក បើពុំនោះទេ រាល់សកម្មភាពរកស៊ីរបស់អ្នកអាចនឹងមានបញ្ហាឈានដល់ការក្ស័យធនក៏អាចថាបាន។
៣. សមត្ថភាពក្នុងការសម្របខ្លួន៖
អ្នកដែលមានភាពជោគជ័យនៅក្នុងអាជីពការងារ ឬអាជីវកម្មត្រូវតែមានសមត្ថភាពក្នុងការសម្របខ្លួនទៅនឹងការផ្លាស់ប្ដូរដូចជាប្រភេទការងារ មនុស្សដែលយើងធ្វើការងារជាមួយ និងទីកន្លែងធ្វើការ។ ឧទាហរណ៍ នៅពេលដែលអ្នកត្រូវបានបញ្ជូនអោយទៅបំពេញបេសកកម្មនៅបរទេសក្នុងអំឡុងពេលណាមួយ អ្នកត្រូវតែចេះសម្របខ្លួនទៅនឹងវប្បធម៌ថ្មី នឹងរបៀបរបបធ្វើការជាមួយនឹងក្រុមការងារដែលមានវប្បធម៌ និងទំនៀមទំលាប់ខុសពីអ្នក។ ចំពោះអ្នករកស៊ី អ្នកត្រូវចេះបត់បែនជាមួយអតិថិជនដែលមានចរិតឆេវឆាវ ដោយសម្របទៅតាមស្ថានភាព ទើបរិះរកដំណោះស្រាយពេលក្រោយ។
៤. សមត្ថភាពក្នុងការដោះស្រាយបញ្ហា៖
អ្នកដែលមានភាពជោគជ័យនៅក្នុងជីវិតភាគច្រើនត្រូវតែមានជំនាញក្នុងការដោះស្រាយបញ្ហានេះ។ មិនថាក្នុងការធ្វើអាជីវកម្ម ឬការងារ អ្នកតែងតែប្រឈមនឹងបញ្ហាជារឿយៗ។ ហើយការពឹងពាក់គេអោយមកជួយអ្នក គឺមិនមែនជាដំណោះស្រាយដ៏យូរអង្វែងនោះទេ។ ដូច្នេះ អ្នកគួរតែត្រៀមខ្លួនដើម្បីប្រឈមមុខនឹងបញ្ហាដែលនឹងកើតឡើលើអ្នក។ ដើម្បីមានជំនាញនេះ ទី១៖ អ្នកត្រូវរៀនទទួលតួនាទីជាអ្នកដឹកនាំក្នុងក្រុម ដូចជាធ្វើជាប្រធានថ្នាក់ ធ្វើជាមេក្រុមធ្វើការងារគ្រូដាក់អោយ រឺចាប់ផ្តើមជំនួញណាតូចមួយដោយខ្លួនឯង។ នៅពេលអ្នកខ្វល់ខ្វាយពីលទ្ធផលការងារខ្លាំង អ្នករឹតតែមានភាពជាអ្នកដឹកនាំដោះស្រាយបញ្ហាខ្ពស់។ ប្រសិនបើអ្នកនៅតែចង់ធ្វើការអោយអ្នកដទៃ អ្នកអាចនឹងមានអារម្មណ៍ថាទុកការដោះស្រាយនោះអោយមេធំជាអ្នកទទួលខុសត្រូវចុះ។ នេះជាការដកខ្លួនអ្នកបណ្តោះអាសន្ន ប៉ុន្តែអ្នកអាចគេចវេសមួយពេល ដោយគ្មានបានអ្វីមកវិញទេ។ យកល្អអ្នកគួររៀនទទួលខុសត្រូវចាប់ ទើបអាចមានជំនាញការដោះស្រាយបញ្ហានេះបានខ្ពស់។
៥. ការអង្គេត៖
ការប្រមូលទឹន្នន័យគឺពិតជាមានសារៈសំខាន់ណាស់ក្នុងការដោះស្រាយបញ្ហា តាមរយៈធ្វើការបកស្រាយទិន្នន័យ ក៏ដូចជារៀបចំយុទ្ធសាស្ត្រដើម្បីអនាគត។ ប្រភេទអង្កេតគឺជាផ្នែកមួយនៃការស្រាវជ្រាវរបស់អ្នក។ និយាយរួមអ្នកក៏ត្រូវចេះធ្វើការស្រាវជ្រាវផងដែរ។ ការអង្កេតអំពីបាតុភូតណាមួយ ស្ថិតលើភាពវ័យឆ្លាត បទពិសោធន៍ និងការវិភាគរបស់អ្នក ទើបការអង្កេតរបស់អ្នកអាចអោយផលបាន។ ឧទាហរណ៍នៅពេលអ្នកចង់បើកការរកស៊ីទាក់ទងនឹងការអប់រំដូចជាការបើកសាលាភាសាអង់គ្លេសមួយ អ្នកត្រូវអង្កេតអំពីតម្រូវការរបស់អតិថិជន ទីកន្លែងអំណោយផល តម្លៃទីផ្សារ និងដៃគូប្រកួប្រជែងជាមួយអ្នក។