isophal.com

១.លក្ខណៈទូទៅ

មេរោគម៉ាក្រូ (macro virus) គឺជាមេរោគកុំព្យូទ័រដែលសរសេរស្រដៀងគ្នានៅក្នុងភាសារម៉ាក្រូដែល វាត្រូវបានគេប្រើក្នុងកម្មវិធីកុំព្យូទ័រ Microsoft Excel ឬកម្មវិធីវាយអត្ថបទដូចជា Microsoft Word ជាដើម។ ពេលដែលមេរោគម៉ាក្រូចាប់ផ្តើមឆ្លង គឺឆ្លងតាមលំដាប់ស្របពេលដែលកម្មវិធីត្រូវបានបើក ឬចុច(click) មេរោគម៉ាក្រូចាប់ផ្តើមដំណើរការដោយស្វ័យប្រវត្តិ។

មេរោគម៉ាក្រូផ្តោតទៅលើកម្មវិធី (application) មិនមែនផ្តោតលើប្រព័ន្ធប្រតិបត្តិការនោះទេ ហេតុដូចនេះមេរោគនេះអាចឆ្លង ទៅកុំព្យូទ័រផ្សេងៗនៅលើគ្រប់ប្រព័ន្ធប្រតិបត្តិការទាំងអស់ ដែលមានកម្មវិធីអាចដំណើរការកូដម៉ាក្រូបាន មិនថាអ្នកដំណើរការ ប្រព័ន្ធ MacOS និង Linux ក៏ដោយ។

២.ដំណើរការរបស់ Macro និង ផលប៉ះពាល់

មេរោគម៉ាក្រូធ្វើការដោយបង្កប់កូដដែលមានមេរោគ(malicious code)នៅក្នុងម៉ាក្រូ ដែលភ្ជាប់ក្នុងឯកសារដូចជា៖ ឯកសារសៀវភៅបញ្ជី (spreadsheet) និងឯកសារទិន្នន័យផ្សេងទៀតដែលបង្កឱ្យកម្មវិធីដែលមានកូដមេរោគដំណើរការ នៅពេលដែលឯកសារត្រូវបានបើក។ ជាធម្មតាមេរោគម៉ាក្រូត្រូវបានបញ្ជូនតាមរយៈអ៊ីម៉ែលបោកបញ្ឆោត (phishing email) ដែលមានភ្ជាប់ឯកសារដែលមានមេរោគ (malicious attachment) មេរោគម៉ាក្រូអាចរីករាលដាលយ៉ាងឆាប់រហ័ស នៅពេល ដែលអ្នកប្រើប្រាស់ចែករំលែកឯកសារដែលមានផ្ទុកមេរោគនោះ។

នៅពេលដែលមេរោគម៉ាក្រូត្រូវបានដំណើរការ វានឹងឆ្លងទៅកាន់រាល់ឯកសារផ្សេងៗទៀតនៅលើកុំព្យូទ័ររបស់អ្នកប្រើប្រាស់។ មេរោគម៉ាក្រូមួយចំនួនអាចបង្កឱ្យមានភាពមិនប្រក្រតីដូចជា ការបញ្ចូល ឬលុបអក្សរក្នុងឯកសារ មេរោគម៉ាក្រូផ្សេងទៀត អាចចូលគ្រប់គ្រងគណនីអ៊ីម៉ែល រួចធ្វើការផ្ញើច្បាប់ចម្លងនៃឯកសារឆ្លងមេរោគ ទៅគ្រប់អាសយដ្ឋានទំនាក់ទំនងដែលមានក្នុង គណនីអ៊ីម៉ែលរបស់អ្នកប្រើប្រាស់ បន្ទាប់មកអ្នកប្រើប្រាស់ផ្សេងៗទៀតអាចនឹងបើកឯកសារទាំងនេះ ពីព្រោះតែពួកគេគិតថា មកពីប្រភពដែលទុកចិត្ត។

៣.វិធីសាស្រ្តកាពារ

ដោយមេរោគម៉ាក្រូត្រូវបានរីករាលដាលនៅតាមរយៈឯកសារកម្មវិធី ដែលត្រូវបានចែករំលែកនៅលើអ៊ីនធឺណេត ជាពិសេស ក្នុងអ៊ីម៉ែលបោកបញ្ឆោត នាំឱ្យប្រព័ន្ធការពារមេរោគម៉ាក្រូបានដាក់បញ្ចូលមុខងារស្កេនឯកសារភ្ជាប់មកជាមួយអ៊ីម៉ែល ដែល អាចការពារដោយអ្នកប្រើប្រាស់ពីការបើកឯកសារដែលគួរអោយសង្ស័យ និងអាចការពារកូដមេរោគម៉ាក្រូមិនឱ្យដំណើរការ នៅពេលឯកសារត្រូវបានបើក។បច្ចេកទេសមួយចំនួនដើម្បីបង្ការការរីករាលដាលនៃមេរោគម៉ាក្រូរួមមាន:

• ប្រើប្រាស់មុខងាររាំងខ្ទប់សារអត់ប្រយោជន៍ (spam filter) ក្នុងកាត់បន្ថយអ៊ីម៉ែលបោកបញ្ឆោតចូលក្នុងប្រអប់សារ ជាវិធានការមួយដើម្បីកាត់បន្ថយអត្រានៃកាឆ្លងមេរោគនៅលើកុំព្យូទ័ររបស់អ្នកប្រើប្រាស់
• ប្រើកម្មវិធីកំចាត់មេរោគ ព្រោះកម្មវិធីទាំងនោះមានមុខងារជូនដំណឹងដល់អ្នកប្រើប្រាស់ឱ្យបានដឹង នៅពេលដែលពួកគេទាញយក ឬបើកតំណភ្ជាប់ដែលមានបង្កប់មេរោគ
• ត្រូវប្រាកដថាកុំព្យូទ័ររបស់អ្នកកំពុងដំណើរការកំណែកម្មវិធីចុងក្រោយបង្អស់ ហើយត្រូវបា្រកដថាបំណះសុវត្ថិភាព (securities patch) ទាំងអស់ត្រូវបានតំឡើងរួចរាល់
• កុំបើកឯកសារភ្ជាប់ពីអ្នកផ្ញើដែលអ្នកមិនស្គាល់
• កុំបើកឯកសារភ្ជាប់នៅក្នុងសារអ៊ីម៉ែលដែលអ្នកសង្ស័យ ទោះបីជាអ៊ីម៉ែលយើងស្គាល់ប្រភពច្បាស់ក៏ដោយ
• ដំណើរការមុខងារសុវត្ថិភាពម៉ាក្រូនៅលើ Microsoft Word និង Excel ហើយត្រូវមានការប្រុងប្រយ័ត្នបំផុតបើអ្នកបើកដំណើរការមុខងារម៉ាក្រូ
• បិតមុខងារម៉ាក្រូបើសិនអ្នកមិនត្រូវការ។

៤.វិធីសាស្ត្រលុបមេរោគ Macro

• ជំហានដំបូងដើម្បីលុបមេរោគម៉ាក្រូគឺត្រូវ Reboot ម៉ាស៊ីនកុំព្យូទ័រ ហើយចូលទៅកាន់ Safe mode បន្ទាប់មកធ្វើការលុបឯកសារដែលរក្សាទុកនៅក្នុង Temporary files ទាំងអស់នឹងជួយបង្កើនល្បឿនក្នុងការស្កេនមេរោគ ក៏ដូចជាបង្កើនទំហំផ្ទុករបស់ថាសរឹង និងលុបចោល temporary file ដែលមានមេរោគ។
• ជាចុងក្រោយធ្វើការស្កេនកុំព្យូទ័រដែលមានមេរោគ បើកុំព្យូទ័ររបស់អ្នកកំពុងដំណើរការកម្មវិធីកំចាត់មេរោគស្រាប់ សូមធ្វើជ្រើរើសមុខងារស្កេនថ្មីដើម្បីត្រួតពិនិត្យមេរោគម៉ាក្រូ ព្រោះកម្មវិធីកំចាត់មេរោគដែលកំពុងដំណើរដោយស្វ័យវត្តនោះអាចមិនបានត្រួតពិនិត្យឃើញមេរោគ ក្នុងករណីនេះសូមប្រើមុខងារស្កេន ដោយធ្វើការស្កេនពេញលេញ (full scan) ដើម្បីមានលទ្ធភាពត្រួតពិនិត្យមេរោគឡើងវិញទាំងអស់នៅលើកុំព្យូទ័រ។

៥.ឯកសារយោង

https://searchsecurity.techtarget.com/definition/macro-virus