តើបងប្អូនទាំងអស់គ្នាមានដែរឮ និងធ្លាប់សាក់ប្រើកម្មវិធី Adobe ទេ? ប្រហែលជាមានបងប្អូនមួយចំនួនហើយដែលធ្លាប់បានសាកប្រើនោះ។ ជាការពិតណាស់ សព្វថ្ងៃនេះ សឹងថានៅគ្រប់កន្លែងធ្វើការណាទាំងអស់ គឺគេពេញនិយមប្រើកម្មវិធី Adobe ដោយសារតែវាមានមុខងារជាច្រើន ជាមួយនឹងការបន្ថែមមុខងារថ្មីៗ បានធ្វើឲ្យការបំពេញការងាររបស់បងប្អូនមួយចំនួនមានភាពរលូនល្អ នឹងចំនេញពេលវេលាទៀតផង។ នេះសម្រាប់បងប្អូនដែលធ្លាប់បានប្រើ ចុះចំណែកបងប្អូនមួយចំនួនផ្សេងទៀតដែលមិនដែលសាកប្រើ ឬក៏ដឹងឭ ឬក៏បានត្រឹមតែឭគេនិយាយតែមិនដឹងថាជាអ្វីឲ្យច្បាស់ ចឹងនៅពេលនេះខ្ញុំនឹងចូលរួមចែករំលែកចំណេះដឹងអំពីមុខងារដ៏ពេញនិយមរបស់ប្រភេទកម្មវិធី Adobe ឲ្យបងប្អូនបានស្គាល់ទាំងអស់គ្នា។
ជាដំបូង ខ្ញុំសូមធ្វើការពន្យល់អំពីកម្មវិធី Adobe ជាមុនសិន។ កម្មវីធី Adobe គឺជាប្រភេទកម្មវិធីកុំព្យូទ័រដ៏ពេញនិយមមួយដែលមានអ្នកប្រើប្រាស់ទូទាំងពិភពលោកនាពេលសព្វថ្ងៃនេះ ហើយកម្មវិធីនេះមានមុខងារជាច្រើន ដោយផ្តោតទៅលើការរចនា (design) មិនថារូបភាព ឬក៏វីដេអូទ្បើយ។
កម្មវិធី Adobe បានចែកចេញជា ៤ផ្នែកសំខាន់ៗដែលមានដូចជា៖
- កម្មវិធីរចនារូបភាព ឬក្រាហ្វិច
- កម្មវិធីរចនាគេហទំព័រ
- កម្មវិធីកាត់តវីដេអូ
- កម្មវិធីកែប្រែសម្លេង
កម្មវិធីរចនារូបភាព ឬក្រាហ្វិច គឺត្រូវបានគេប្រើក្នុងគោលបំណងបង្កើតរូបភាពថ្មីមួយ បង្កើតផ្ទាំងផ្សព្វផ្សាយពាណិជ្ជកម្ម ឬក៏អ្វីមួយដែលមានការកែប្រែឲ្យខុសពីទ្រង់ទ្រាយដើម ហើយទៅជាអ្វីមួយទៀតក្នុងរូបភាពជាក្រាហ្វិចដែលមានភាពទាក់ទាញជាងមុន ដែលគេហៅថា editing។ កម្មវិធីដែលគេពេញនិយមប្រើមានដូចជា៖ Adobe Photoshop, Adobe Lightroom, Adobe InDesign, Adobe Illustrator, និង Adobe Acrobat។
ងាកមកមើលកម្មវិធីរចនាគេហទំព័រវិញម្តង ដូចឈ្មោះរបស់កម្មវិធីចឹង គឺគេប្រើវាដើម្បីបង្កើតគេហទំព័រ ឬក៏ធ្វើកំណែរទម្រង់ទៅលើគេហទំព័រណាមួយដែលជារបស់ស្ថាប័ន ឬក៏របស់ផ្ទាល់ខ្លួន។ កម្មវិធីដែលគេពេញនិយមប្រើមានដូចជា៖ Adobe Dreamweaver និង Adobe Flash។
កម្មវិធីកាត់តវីដេអូរបស់ Adobe វិញ គឺជាប្រភេទមុខងារកម្មវិធីមួយដែលមានការនិយមប្រើប្រាស់យ៉ាងទូលំទូលាយ សឹងតែផ្តាច់មុខគេ សម្រាប់ការបង្កើតវីដេអូផ្សេងៗ ដោយសារតែមានមុខងារ ក៏ដូចជា features ជាច្រើនដែលអាចឲ្យយើងរចនា និងបង្កើតវីដេអូដែលមានរូបភាព និង effect ប្លែកៗបានជាច្រើន។ កម្មវិធីដែលគេពេញនិយមប្រើមានដូចជា៖ Adobe Premiere Pro, Adobe After Effects, Adobe Encore, និង Adobe Character Animation ជាដើម។
ជាចុងក្រោយ កម្មវីធីកែប្រែសម្លេងរបស់ Adobe ត្រូវបានស្ថាប័នវិទ្យុ ឬក៏ស្ថាប័នផ្សព្វផ្សាយព័ត៌មាននិយមប្រើប្រាស់ ដោយសារតែមុខងារជាច្រើនរបស់វា ក៏ដូចជាភាពងាយស្រួលក្នុងការប្រើប្រាស់ផងដែរ។ កម្មវិធីដែលគេពេញនិយមប្រើគឺ Adobe Audition។
ចំពោះរូបខ្ញុំផ្ទាល់ គឺជាអ្នកប្រើប្រាស់បណ្តាកម្មវិធីរបស់ Adobe ផងដែរក្នុងការបំពេញការងារ ដោយខ្ញុំចាប់ផ្តើមប្រើប្រាស់វាតាំងពីពេលនៅរៀនមក។ ជាការពិតណាស់ មុខងាររបស់វាមួយចំនួនបានជួយសម្រួលការងាររបស់ខ្ញុំបានជាច្រើន មិនថាពេលធ្វើកិច្ចការស្រាវជ្រាវ ឬក៏ការធ្វើការងារនៅកន្លែងធ្វើការទ្បើយ។ ហើយកម្មវិធីដែលខ្ញុំចូលចិត្តប្រើមានដូចជា Adobe Photoshop, Adobe Premiere Pro, Adobe After Effect, Adobe Audition, និង Adobe Dreamweaver។ មុខងាររបស់កម្មវិធីមួយចំនួន មិនមានការបង្រៀននៅតាមសាលាទាំងអស់ទេ ក៏ប៉ុន្តែយើងអាចរៀនប្រើវាបានដោយមើលលំនាំ ឬក៏វីដេអូបង្ហាត់បង្រៀនជាច្រើននៅតាម YouTube ហើយធ្វើការអនុវត្តឲ្យបានច្រើនតាមដែលអាចធ្វើបាន រហូតដល់យើងចាប់បានពីមុខងារនីមួយៗ។ សម្រាប់បងប្អូនមួយចំនួនដែលបានអានត្រួសៗរួចហើយ គួរតែចាប់ផ្តើមរៀនប្រើប្រាស់បណ្តាមុខងារកម្មវិធីរបស់ Adobe ក្នុងការបំពេញការងារ ដោយសារតែលក្ខណៈងាយស្រួល និងកើនចំណេះទៀតផង៕