តើពាក្យ វិទ្យាសាស្ត្រកុំព្យូទ័រ និងព័ត៌មានវិទ្យា ខុសគ្នាយ៉ាងដូចម្តេច?

មកដល់ពេលបច្ចុប្បន្ននេះមុខជំនាញវិទ្យាសាស្ត្រកុំព្យូទ័រ និងព័ត៌មានវិទ្យា នៅតែត្រូវបានបែងចែកមិនទាន់ច្បាស់ទូលំទូលាយនៅឡើយពីប្រជាជនកម្ពុជា រួមទាំងប្អូនៗនិស្សិតជំនាញនេះផងដែរ។ ការពិតទៅជំនាញទាំងពីរនេះត្រូវបានគេស្គាល់ជាទូទៅហៅថា “IT” ហ្នឹងឯង ប៉ុន្តែនិយមន័យត្រឹមត្រូវនៃការសិក្សាជំនាញនេះ គឺវាមានភាពខុសគ្នាច្រើន ជាពិសេសទាក់ទងនឹងអាជីពការងារ។

យោងទៅតាមសាស្ត្រាចារ្យជំនាញមួយរូបបានបកស្រាយថា “វិទ្យាសាស្ត្រកុំព្យូទ័រ” ជាមុខជំនាញដែលផ្តោតទៅលើការរចនាប្រព័ន្ធកុំព្យូទ័រ ការអភិវឌ្ឍកម្មវិធី ដោយប្រើក្បួនដោះស្រាយផ្អែកលើគណិតវិទ្យា ដែលជាមុខវិជ្ជាស្នូលសម្រាប់ជំនាញមួយនេះ។ មួយវិញទៀតគឺការសិក្សាទាក់ទងនឹងការបង្កើត និងរចនាគេហទំព័រតាមរយៈភាសាមួយចំនួនដូចជា JavaScript, MySQL, PHP, HTML និង CSS ជាដើម។ ក្រោយពីបញ្ចប់ការសិក្សា ប្អូនៗនិស្សិតអាចមានឱកាសការងារល្អៗដូចជា អ្នកបង្កើតកម្មវិធីទូរសព្ទ, អ្នកសរសេរកម្មវិធី, អ្នកបង្កើត និងរចនាគេហទំព័រ -ល-។

ងាកមកជំនាញ “ព័ត៌មានវិទ្យា” វិញគឺនិស្សិតៗទទួលបានការបណ្តុះបណ្តាលទាក់ទងនឹងការតំឡើង និងការរៀបចំប្រព័ន្ធកុំព្យូទ័រ ជាពិសេសគឺការវិភាគ និងគ្រប់គ្រងប្រព័ន្ធសុវត្ថិភាពរបស់កុំព្យូទ័រ។ ក្រោយសិក្សាជំនាញនេះចប់ ប្អូនៗនិស្សិតនឹងទទួលបាននូវឱកាសការងារដូចជា Database, Administration, Computer Support, Network Engineer, System Analyst និង System Engineer ជាដើម។

យ៉ាងណាមិញជំនាញទាំងពីរនេះហាក់មានការរៀនបញ្ចូលគ្នាទាំង ៤ឆ្នាំ ដោយគ្មានការបែងចែកឡើយនៅតាមសាកលវិទ្យាល័យមួយចំនួននៅកម្ពុជា។ ដូច្នេះ Zourbong សូមលើកទឹកចិត្តឱ្យប្អូនៗជ្រើសរើសគ្រឹះស្ថានសិក្សាឱ្យបានម៉ត់ចត់ និងខិតខំសិក្សាទាំងក្នុងសាលារៀនក្តី និងការសិក្សាបន្ថែមនូវមុខវិជ្ជាដែលមិនរួមបញ្ចូលក្នុងកម្មវិធីសិក្សារបស់សាលាក្តី ដើម្បីទទួលបាននូវចំណេះដឹងល្អៗឆ្ពោះទៅរកការងារល្អៗនាពេលអនាគត៕

អត្ថបទដោយ៖ Bee Smile