ក្នុងយុគសម័យថ្មីនេះ មនុស្សរស់នៅពឹងផ្អែកលើបច្ចេកវិទ្យាស្ទើរតែទាំងស្រុង ។ ស្របពេលបច្ចេកវិទ្យាមានភាពរីកចម្រើន ភាសា Programming បានដើរតួនាទីយ៉ាងសំខាន់ក្នុងការជួយដល់មនុស្ស ក្នុងការបំពេញការងារណាមួយ ។ ជាក់ស្តែង ខណៈ ពេល ភាសា Programming ចេះតែជឿនលឿនទៅៗ យើងក៏មិនត្រូវភ្លេចពីស្ថាបនិកណាម្នាក់ដែលបានបង្កើតភាសាទាំងនោះឡើងដែរ ។ យើងបានដឹងរួចមកហើយ ពីស្ថាបនិកដែលបានបង្កើតភាសា C ឡើងគឺ លោក Dinnis Ritchie និង ភាសា C++ គឺ លោក Bjarne Stroustrup ។ ថ្ងៃនេះទស្សនាវដ្ដីអាន-ANT សូមលើកយកអត្ថបទមួយទៀតនិយាយពី ជីវប្រវត្តិសង្ខេបរបស់ស្ថាបនិកបង្កើតភាសា Java ឡើង ដើម្បីឲ្យបងប្អូនដែលរៀនភាសា Programming ទាំងអស់បានយល់ដឹងដូចខាងក្រោម ៖
♣ ប្រវត្តិជើងខ្លាំងនៃស្ថាបនិកបង្កើតភាសា Java
លោក James A. Gosling គឺជាអ្នកវិទ្យាសាស្រ្តកុំព្យូទ័រម្នាក់ដែលមានកេរ្តិ៍ឈ្មោះល្បីល្បាញ ក្នុងការបង្កើតភាសា Java ឡើង ដែលគេឲ្យឈ្មោះថា ជាបិតានៃភាសា Java Programming Language ។ គាត់កើតនៅថ្ងៃទី ១៩ ខែ ឧសភា ឆ្នាំ ១៩៥៥ នៅក្នុងរដ្ឋ Alberta ប្រទេសកាណាដា ។ គាត់បានទទួលសញ្ញាប័ត្រថ្នាក់បរិញ្ញាប័ត្រផ្នែក (BA) វិទ្យាសាស្ត្រកុំព្យូទ័រមកពី University of Calgary ក្នុងឆ្នាំ ១៩៧៧ និង សញ្ញាប័ត្រថ្នាក់បណ្ឌិត (Ph.D.) ផ្នែកវិទ្យាសាស្ត្រកុំព្យូទ័រមកពី Carnegie Mellon University ក្នុងឆ្នាំ ១៩៨៣ ដែលនិក្ខេបបទបណ្ឌិតរបស់គាត់មានចំណងជើងថា « The Algebraic Manipulation of Constraints » ។ កំឡុងពេលគាត់នៅថ្នាក់បណ្ឌិត គាត់បានសរសេរពីកំណែប្រែនៃ Emacs (Version of Emacs) ហៅថា Gosling Emacs (Gosmacs) ។ ខណៈ គាត់នៅ Carnegie Mellon University បានបង្កើត multi-processor version of Unix ក៏ដូចជា Compilers និង Mail System ជាច្រើនផងដែរ ។ James Gosling បានចូលជាសមាជិកនៃក្រុមហ៊ុន Sun Microsystems នៅក្នុងឆ្នាំ ១៩៨៤ ។ នៅថ្ងៃទី ០២ ខែ មេសា ឆ្នាំ ២០១០ គាត់បានចាកចេញពី ក្រុមហ៊ុន Sun Microsystems ។ នៅថ្ងៃទី ២៨ ខែ មីនា ឆ្នា ២០១១ គាត់បានធ្វើការផ្សាយនៅលើ blog របស់គាត់ថាគាត់ត្រូវបានជួលដោយក្រុមហ៊ុន Google ។ ហើយប្រាំខែក្រោយមកទៀត គាត់ក៏បានផ្សាយថា គាត់ចូលជាសមាជិកនៃ Liquid Robotics ក្នុងការចាប់ផ្តើមផ្ដល់នូវសេវាផ្គត់ផ្គង់ទិន្នន័យលើសមុទ្រ ។ នៅថ្ងៃទី ២២ ខែ ឧសភា ឆ្នាំ ២០១៧ គាត់បានផ្សាយនៅលើ Facebook របស់គាត់ថា គាត់នឹងចូលជាសមាជិកនៃ Amazon Web Service ។ គាត់ក៏បានធ្វើការជាអ្នកផ្ដល់មតិយោបល់ (Advisor) នៅក្រុមហ៊ុនថ្មីមួយគឺ Company Scala Company Typesafe ផងដែរ ។
លោក James Gosling គឺជាបិតានៃ ភាសា Java Programming កំឡុងពេលគាត់នៅ Sun Microsystems ក្នុងឆ្នាំ ១៩៨៤ និង ២០១០ ដែលគាត់បានបង្កើតភាសា Java ក្នុងឆ្នាំ 1994 ។ Java ត្រូវបានរចនាឡើងដំបូងសម្រាប់ឲ្យមានអន្តរកម្មជាមួយទូរទស្សន៍ ហើយវាបង្ហាញពីភាសាមួយដែលមានភាពជឿនលឿន ។ ហើយ syntax នៃភាសា java គឺមានភាពដូចជាមួយភាសា C និង C++ ច្រើន ដែលមាន object model សាមញ្ញ និងមានលក្ខណៈ low-level តិចតួច ។ Java Application ជាចម្បងធ្វើការ compile bytecode ដែលអាចធ្វើការដំណើរការនៅលើ Java Virtual Machine (JVM) ទាំងអស់ ។ James Gosling បានផ្ដល់នូវ system software ជាច្រើនរួមបញ្ចូលទាំង NeWS និង Gosling Emacs និងជាធ្វើការសហនិពន្ធកម្មវិធីមួយឈ្មោះថា « bundle» ដែលបានបានបង្ហាញលម្អិតនៅក្នុងសៀវភៅរបស់ Brain Kernighan និង Rob Pike ដែលជានិយាយពី The Unix Programming Environment ។ James Gosling គាត់រស់នៅយ៉ាងមានសុភមង្គលជាមួយជីវិតអាពាហ៍ពិពាហ៍របស់គាត់ ដែលគាត់មានកូនស្រីចំនួនពីរនាក់គឺ Kate និង Kelsey ។
♣ កិត្តិយស និងស្នាដៃ
លោក James A. Gosling បានទទួលពានរង្វាន់ The Economist Innovation Award និងពានរង្វាន់The Flame Award USENIX Lifetime Achievement Award នៅក្នុងឆ្នាំ ២០០២ ។ នៅក្នុងឆ្នាំ ២០០៧ គាត់បានបង្កើតស្នាដៃមួយដែលមានចំណងជើងថា « Officer of the Order ofCanada » ដែលជាពានរង្វាន់ខ្ពស់បំផុតទីពីរដែលអាចផ្ដល់នូវ សារៈប្រយោជន៍ដល់ជនស៊ីវិលណាមួយនៅប្រទេសកាណាដា ។ James ក៏បានទទួលកិត្តិយសដោយការជ្រើសរើសជាសមាជិករបស់ Foreign Associate member of the United States National Academy of Engineering របស់សហរដ្ឋអាមេរិកផងដែរ ។ ក្នុងឆ្នាំ ២០១៣ គាត់បានក្លាយជាសមាជិកម្នាក់នៃសមាគម Association for Computing Machinery និងគាត់ទទួលបានពានរង្វាន់ IEEE John von Neumann Medal ក្នុងឆ្នាំ ២០១៥ ។
♣ រូបថតខ្លះៗរបស់លោក James A. Gosling
♦ រៀបរៀងអត្ថបទដោយ៖ លោក អូន ហ៊ិនស៊ី
សូមទាញយកសៀវភៅមេរៀន៖
Download