ប្រហែលជាលោកអ្នកមានផលិតផល ឬសេវាកម្មមួយដែលល្អបំផុតហើយ..តែហេតុអ្វីបែរជាពុំសូវជាទទួលបានការចាប់អារម្មណ៍ពីអតិថិជនសោះ? ឬក៏ការបម្រើសេវាកម្មអតិថិជនរបស់លោកអ្នកធ្វើបានល្អបំផុតហើយ តែហេតុអ្វីបានជាពុំសូវមានភ្ញៀវអ៊ីចឹង? ឬមួយក៏លោកអ្នកកំពុងតែចាប់ផ្តើមបើកដំណើរការអាជីវកម្មហើយ តែហាក់ដូចជាគ្មានអតិថិជនណាស្គាល់ និងគាំទ្រសោះ? តើទាំងនេះបណ្តាលមកពីមូលហេតុអ្វី?ទាំងអស់នេះហើយគឺជាចម្ងល់ ក៏ដូចជាបញ្ហាដែលម្ចាស់អាជីវកម្មជាច្រើន បាននឹងកំពុងតែជួបប្រទះនៅក្នុងការធ្វើអាជីវកម្មរបស់ខ្លួនសព្វថ្ងៃ។ ជាការពិតណាស់ ការដែលលោកអ្នកសម្រេចចិត្តក្នុងការបើកដំណើរការអាជីវកម្មមួយដោយខ្លួនឯងលោកអ្នកបានខិតខំប្រឹងប្រែងយ៉ាងត្រដាបត្រដួសទម្រាំមកដល់ចំណុចនេះគឺមិនមែនជារឿងងាយស្រួលនោះទេ ហើយលោកអ្នកក៏រំពឹងចង់ឱ្យអាជីវកម្មរបស់លោកអ្នករីកចម្រើនទៅមុខប្រកបដោយភាពជោគជ័យផងដែរ។ ប៉ុន្តែប្រសិនបើក្នុងពេលនេះអាជីវកម្មរបស់លោកអ្នកហាក់ដូចជាពុំសូវមានការរីកចម្រើន ឬពុំសូវមានអតិថិជនច្រើនដូចជាដៃគូប្រកួតប្រជែងនោះអ្វីដែលលោកអ្នកគួរតែធ្វើ គឺជាការត្រឡប់ទៅត្រួតពិនិត្យមើលអាជីវកម្មរបស់លោកអ្នកម្ដងទៀត ហើយសំណួរដែលលោកអ្នកគួរតែពិចារណានៅពេលនេះគឺ “តើខ្ញុំបានអនុវត្តនូវការធ្វើទីផ្សារបានត្រឹមត្រូវ និងខ្ជាប់ខ្ជួនដែរឬទេ?ហគួរបញ្ជាក់ផងដែរថាការធ្វើទីផ្សារ បានចូលរួមចំណែកយ៉ាងសំខាន់នៅក្នុងការបង្កើន និងរក្សាកេរ្តិ៍ឈ្មោះនៃអាជីវកម្ម ថែរក្សាអតិថិជនចាស់ៗដែលលោកអ្នកមាន ក៏ដូចជាឈោងចាប់នូវអតិថិជនថ្មីៗបន្ថែមទៀតផងដែរ។ ក្រៅពីនេះ ការធ្វើទីផ្សារក៏ជាកត្តាដ៏ចម្បងមួយ ដែលអាចជួយឱ្យអាជីវកម្មរបស់លោកអ្នករីកចម្រើន ក៏ដូចជាទទួលបាននូវភាពជោគជ័យផងដែរ។ កត្តាទាំងអស់នេះហើយបានជាលោកអ្នកចាំបាច់ត្រូវតែអនុវត្តនូវការធ្វើទីផ្សារឱ្យបានខ្ជាប់ខ្ជួន។ ប្រសិនបើលោកអ្នកមើលរំលងនូវចំណុចដ៏សំខាន់មួយនេះ ពិតណាស់អាជីវកម្មរបស់លោកអ្នកនឹងត្រូវបានអតិថិជនមើលរំលងដូចគ្នាដែរ ហើយក៏គ្មានឱកាសនៅក្នុងការយកឈ្នះដៃគូប្រកួតប្រជែងបានឡើយ។
តើការធ្វើទីផ្សារ (Marketing) ជាអ្វី?
ការធ្វើទីផ្សារ (Marketing) គឺជាដំណើរការ ឬសកម្មភាពទាំងឡាយណា ដែលត្រូវបានអនុវត្តនៅក្នុងគោលបំណងទាក់ទាញអតិថិជនឱ្យមកចាប់អារម្មណ៍លើផលិតផល ឬសេវាកម្មរបស់លោកអ្នក។ បន្ថែមពីនេះ ការធ្វើទីផ្សាររួមមានដូចជា ការសិក្សាអំពីទីផ្សារ (Market Research) ការកំណត់នូវអតិថិជនគោលដៅ (Target Audience) ការផ្សព្វផ្សាយពាណិជ្ជកម្ម (Advertising) ការសិក្សាស្វែងយល់អំពីឥរិយាបទនៃការទិញរបស់អតិថិជន (Consumer Behavior) ក៏ដូចជាការវិភាគទៅលើការធ្វើយុទ្ធនាការទីផ្សារ (Marketing Campaign) ទាំងមូលឱ្យបានល្អិតល្អន់ ដើម្បីតាមដាន ស្វែងរក ក៏ដូចជាពង្រឹងបន្ថែមនូវចំណុចខ្វះខាតដែលមាន ក្នុងគោលបំណងធ្វើយ៉ាងណាបំពេញនូវតម្រូវការរបស់អតិថិជនឱ្យបានកាន់ល្អប្រសើរជាងមុន។
