ជំនាញ រឹង និងជំនាញទន់មានសារៈសំខាន់ដូចគ្នា។ ប្រសិនជា មានតែជំនាញរឹងមួយយកទៅធ្វើការ ដោយមិនមានជំនាញទន់ផ្គួបផ្សំនោះ ប្រាកដជាមិនអាចបំពេញការងារបានល្អទេ ព្រោះជំនាញទន់ជាផ្នែកធំមួយ ដែលជួយបំពេញការងារឲ្យកាន់តែមានប្រសិទ្ធភាព។ ជាក់ស្តែងនៅក្នុងបរិបទការងារចាំបាច់គេត្រូវការបុគ្គលិក ដែលមានជំនាញច្បាស់លាស់ទាំងជំនាញរឹង និងជំនាញទន់ (ប្រៀបបានដូចជា អ៊ីដ្រូសែន បូក អុកស៊ីសែន បង្កើតបានជាទឹក) ដើម្បីជួយបំពេញគ្នាបន្ថែមឲ្យបរិបយាកាសការងារកាន់តែប្រសើរឡើង។
ជំនាញរឹង (Hard Skill) ជាជំនាញមួយដែលមានលក្ខណៈជាឯកទេស ឬជាលក្ខណៈបច្ចេក ទេស និងវិជ្ជាជីវៈណាមួយច្បាស់លាស់ ដូចជាជំនាញជុសជុលម៉ាស៊ីន ជំនាញកុំព្យូទ័រ អក្សរសាស្ត្រអង់គ្លេស គណនេយ្យហិរញ្ញវត្ថុ សេដ្ឋកិច្ច និងច្បាប់ជាដើម។ ជំនាញនេះ ងាយស្រួលក្នុងការបណ្តុះបណ្តាល និងងាយស្រួលក្នុងការទទួលយកចំណេះដឹងទាំងនោះ ព្រោះវាជាលក្ខណៈទ្រឹស្តីច្រើនជាង។
រីឯ ជំនាញទន់ (Soft Skill) ជាជំនាញមួយដែលមានលក្ខណៈជាសិល្បៈនៃការធ្វើអ្វីមួយប្រកបដោយភាពច្នៃប្រឌិត និងជាលក្ខណៈចិត្តសាស្ត្រច្រើនជាង ដូចជាជំនាញនៃការស្តាប់ ការទំនាក់ទំនង ការលើកទឹកចិត្ត ការនិយាយជាសាធារណៈ ភាពជាអ្នកដឹកនាំ ការគ្រប់គ្រងពេលវេលា និងគ្រប់គ្រងអារម្មណ៍ខ្លួនឯងជាដើម។ ជំនាញនេះ ពិបាកក្នុងការបណ្តុះបណ្តាល និងមិនងាយក្នុងការចាប់យកចំណេះដឹងទាំងនេះឡើយ ព្រោះវាជាលក្ខណៈអរូបិយ និងចិត្តសាស្ត្រ ហើយអាស្រ័យទៅតាមចរិតលក្ខណៈរបស់បុគ្គលម្នាក់ៗ ។
នៅក្នុងបរិបទការងារបុគ្គលិកមួយចំនួនធ្វើការមិនត្រូវតាមជំនាញ ដែលខ្លួនមាននោះទេ។ អ្នកខ្លះរៀនជំនាញគ្រប់គ្រង បែរជាមកធ្វើការជាអ្នកកាសែត។ អ្នកមួយចំនួនទៀត មានជំនាញកផ្នែកវិទ្យាសាស្ត្រកុំព្យូទ័រ តែមកធ្វើការខាងផ្នែករដ្ឋបាលទៅវិញ។ រីឯអ្នកខ្លះទៀត រៀនជំនាញសង្គមវិទ្យា តែបែរជាមយធ្វើជាគ្រូបង្រៀននៅតាមសាលាមតេយ្យឯកជនក៏មានដែរ។ ការធ្វើការខុសជំនាញនេះ ប្រាកដណាស់ថាពួកគេអាចធ្វើបាន ប៉ុន្តែពួកគេមិនមានភាពច្បាស់លាស់ ហើយការងាររបស់ពួកគេក៏ពុំមានប្រសិទ្ធិភាពខ្ពស់ដូច អ្នកធ្វើការតាមជំនាញនោះឡើយ។
ដោយឡែក នៅក្នុងបរិបទការងារដូចគ្នា ប្រសិនបើ បុគ្គលិកមិនមានជំនាញទន់ក្នុងខ្លួនទេ នោះការបំពេញការងារក៏មិនបានល្អដែរ។ ព្រោះជំនាញទន់របស់បុគ្គលិកម្នាក់ៗ ជាផ្នែកមួយដ៏សំខាន់ដើម្បីជំរុញឲ្យមានភាពជោគជ័យទាំងបុគ្គលខ្លួនឯង និងទាំងស្ថាប័នដែលខ្លួនកំពុងបម្រើការងារនោះ ឲ្យកាន់តែរីកចម្រើនថែមទៀតផង។ ជំនាញទន់មួយចំនួននេះមានដូចជា៖
ទី១) ជំនាញធ្វើការងារជាក្រុម។ បុគ្គលិកដែលធ្វើការជាមួយគ្នាត្រូវចេះរៀបចំបែងចែក សហការ និងស្មារតីទទួលខុសត្រូវចំពោះការងារ ដើម្បីអនុវត្តន៍ឲ្យសម្រេចបាននូវគោលដៅដែលស្ថាប័ន បានកំណត់។
ទី២) ជំនាញទំនាក់ទំនង។ ក្នុងការបំពេញការងារចាំបាច់ត្រូវមានទំនាក់ទំនងរវាងបុគ្គលិក ទៅអ្នកគ្រប់គ្រង និងពីអ្នកគ្រប់គ្រង ត្រឡប់មកបុគ្គលិកវិញ ដើម្បីបង្កើនភាពស្និទ្ធស្នាល និងភាពរស់រវើកក្នុងពេលបំពេញការងារ។
ទី៣) ជំនាញគ្រប់គ្រងពេលវេលា។ បុគ្គលិកត្រូវបែងចែកពេលវេលា និងចាត់អាទិភាពការងារឲ្យបានច្បាស់លាស់ ថាតើការងារណាមួយត្រូវធ្វើបន្ទាន់ ការងារណាត្រូវធ្វើបន្ទាប់ និងការងារណាត្រូវទុកធ្វើចុងក្រោយ។
ទី៤) ជំនាញភាពជាអ្នកដឹកនាំ។ បុគ្គលិកត្រូវមានស្មារតីនៃភាពជាអ្នកដឹកនាំ មានការទទួលខុសត្រូវ និងមានគំនិតច្នៃប្រឌិតខ្ពស់ក្នុងការបំពេញការងារ ត្រូវចេះលើកទឹកចិត្ត និងជួយការងារគ្នាទៅវិញទៅមក។ ល៕