Facebook គឺជាបណ្តាញសង្គមមួយដែលមានភាពល្បីល្បាញ និងពេញនិយមបំផុតនៅលើសកលលោកយើងនេះ ដោយមានអ្នកប្រើប្រាស់រហូតដល់ទៅ ប្រហែល ២.២ពាន់លាននាក់ បើគិតមកត្រឹមពាក់កណ្តាលឆ្នាំ២០១៨នេះ។ ក្នុងនោះប្រទេសកម្ពុជាយើងក៏មានចំនួនអ្នកប្រើប្រាស់ប្រហែល ៨លាននាក់ផងដែរ។
ប្រហែលជាមានប្រិយមិត្តមួយចំនួនដែរកំពុងប្រើប្រាស់បណ្តាញសង្គមយក្សមួយនេះមិនទាន់បានដឹងពីប្រវត្តិ និងដំណើរការបស់ Facebook នេះនៅឡើយទេ។ ថ្ងៃនេះយើងនឹងបង្ហាញលោកអ្នកអោយបានស្គាល់ប្រវត្តិខ្លះៗរបស់ Facebook៖
Mark Zuckerberg គឺជាស្ថាបនិករបស់ Facebook មួយក្នុងចំណោម ៥នាក់ដែលកើតនៅថ្ងៃទី ១៤ ខែឧសភា ឆ្នាំ១៩៨៤ នៅក្នុងទីក្រុង New York សហរដ្ឋអាមេរិច។ តាមពិតទៅនៅឆ្នាំ២០០៣ លោក Mark Zuckerberg បានបង្កើតវេបសាយមួយដែលមានឈ្មោះថា Facemash ក្នុងអំឡុងពេលដែលលោកកំពុងសិក្សានៅក្នុងសកលវិទ្យាល័យ Harvard ដោយលោកបាន Hack វេបសាយរបស់សាលា ហើយយករូបភាពមិត្តរួមសាលាមកបង្ហោះនៅលើវែបសាយរបស់ខ្លួន។ ក្នុងរយ:ពេលត្រឹមតែ ៤ម៉ោងដំបូងសោះមានអ្នកចូលមើលវែបសាយ Facemash រហូតដល់ទៅ ២២០០០ នាក់។ ប៉ុន្មានថ្ងៃក្រោយមក Mark Zuckerberg ត្រូវបានសាលាដាក់វិន័យ ប៉ុន្តែសាលានៅតែបន្តអោយលោករស់ក្នុងសាលាដដែល។
នៅថ្ងៃទី៤ ខែកុម្ភ: ឆ្នាំ២០០៤ ជាថ្ងៃដំបូងបង្អស់ដែល Thefacebook ចាប់ផ្តើមដាក់ដំណើរការសម្រាប់សាកលវិទ្យាល័យ Harvard។ ប៉ុន្តែបន្ទាប់ពី Thefacebook ដាក់ដំណើរការបាន ៦ថ្ងៃសិស្សច្បងរបស់គេបានចោទប្រកាន់ថាបានយកគំនិតរបស់ពួកគេមកបង្កើតជា Facebook។ ដោយគេបានអ:អាងថា Mark បានព្រមព្រៀងបង្កើតវេបសាយមួយសម្រាប់ពួកគេដែលមានឈ្មោះថា harvardconnection.com ប៉ុន្តែលោកបែរជាបង្កើត Facebook នេះទៅវិញ។ រហូតដល់ឆ្នាំ២០០៨ រឿងនេះត្រូវបានបញ្ចប់ដោយ ពួកគេទទួលបានភាគហ៊ុនពី Facebook ចំនួន១.២លានដុល្លា។
នៅក្នុងឆ្នាំ ២០០៤ លោក Mark បានបោះបង់ការសិក្សានៅសាកលវិទ្យាល័យ Harvard ដូចជាលោក Bill Gates ជាសហស្ថាបនិកក្រុមហ៊ុន Microsoft ផងដែរ។
នៅខែមិថុនា ឆ្នាំ២០០៤ ហ្វេសប៊ុកបានជួលការិយាល័យតូចមួយនៅក្នុងតំបន់ Palo Alto រដ្ឋកាលីហ្វ័រញ៉ា។ នៅក្នុងខែដដែលហ្វេសប៊ុកបានទទួលការផ្តល់ថវិកានៅខាងក្រៅជាលើកដំបូងដោយការវិនិយោគចំនួន ៥០ម៉ឺនដុល្លារបានមកពីសហស្ថាបនិក PayPal លោកគឺ Peter Thiel និងលោក Elon Musk ។
ក្នុងខែឧសភា ឆ្នាំ២០០៥ ក្រុមហ៊ុនហ្វេសប៊ុកត្រូវបាន Accel Partners បណ្តាក់ទុនចំនួន ១២.៧លានដុល្លារក្នុងហ្វេសប៊ុកហើយលោក Jim Breyer បានបន្ថែមលុយផ្ទាល់ខ្លួនរបស់គាត់ចំនួន ១លានដុល្លាទៀត។
នៅក្នុងឆ្នាំ ២00៦ ហ្វេសប៊ុកបានបង្កើតប៊ូតុង New Feeds ដែរលោកអ្នកប្រើប្រាស់រហូតមកដល់សព្វថ្ងៃសម្រាប់មើល រូបថត,វីដេអូ និងព័ត៍មានដែលទើបតែបង្ហោះថ្មីៗ។
នៅថ្ងៃទី ២៤ ខែតុលា ឆ្នាំ២០០៧ ក្រុមហ៊ុន Microsoft បានប្រកាសថាខ្លួនបានទិញភាគហ៊ុន 1,6 ភាគរយនៃ Facebook ក្នុងតម្លៃ ២៤០លានដុល្លារដែលផ្តល់ឱ្យ Facebook នូវតម្លៃសរុបប្រហែល ១៥ពាន់លានដុល្លារ។ ការទិញរបស់ក្រុមហ៊ុន Microsoft រួមមានសិទ្ធិដាក់ការផ្សាយពាណិជ្ជកម្មអន្តរជាតិនៅលើបណ្តាញទំនាក់ទំនងសង្គម។
នៅក្នុងខែកញ្ញា ឆ្នាំ២០០៩ ហ្វេសប៊ុកបាននិយាយថាវាបានប្រែក្លាយជាលំហូរសាច់ប្រាក់ជាវិជ្ជមានជាលើកដំបូង។ តាមការសិក្សានៅខែមករាឆ្នាំ ២០០៩ ដោយវេបសាយ Compete.com បានចាត់ថ្នាក់បណ្ដាញហ្វេសប៊ុកជាសេវាបណ្តាញសង្គមមានអ្នកប្រើច្រើនបំផុត ដោយមានអ្នកប្រើប្រាស់សកម្មជាច្រើនទូទាំងពិភពលោក។ ហើយហ្វេសប៊ុក ក៏ត្រូវបានរដ្ឋាភិបាលចិន Block នៅក្នុងឆ្នាំ២០០៩ នេះដែរ។
ក្នុងខែកក្កដា ឆ្នាំ២០១០ ក្រុមហ៊ុនបានប្រកាសថាអ្នកប្រើប្រាស់ មានចំនួន 500លាននាក់ ហើយយោងតាមទិន្នន័យរបស់ខ្លួនសមាជិកភាពពាក់កណ្តាលនៃគេហទំព័រនេះបានប្រើហ្វេសប៊ុកប្រចាំថ្ងៃអស់រយៈពេលជាមធ្យម 34 នាទីរីឯអ្នកប្រើ 150លាននាក់បានចូលមើលគេហទំព័រតាមទូរស័ព្ទ។ អ្នកតំណាងក្រុមហ៊ុនបានហៅព្រឹត្តិការណ៍នេះថាជា “បដិវត្តស្ងប់ស្ងាត់” ។
នៅដើម ឆ្នាំ២០១១ ក្រុមហ៊ុនហ្វេសប៊ុកបានប្រកាសផែនការផ្លាស់ប្តូរទីតាំងការិយាល័យកណ្តាលរបស់ខ្លួនទៅ Sun Microsystems នៅ Menlo Park រដ្ឋកាលីហ្វ័រនីញ៉ា។ ក្នុងខែមីនា គេបានរាយការណ៍ថាហ្វេសប៊ុកបានលុបបំបាត់ Profile ២ម៉ឺន ជារៀងរាល់ថ្ងៃដោយសារតែការរំលោភបំពានដូចជា Spam, Graphic Content និងអ្នកប្រើប្រាស់ដែរក្រោមអាយុ ដែលជាផ្នែកមួយនៃកិច្ចខិតខំប្រឹងប្រែងរបស់ខ្លួនក្នុងការបង្កើនសន្តិសុខតាមអ៊ីនធឺណែត។ នៅក្នុងខែកុម្ភ: Mark Zuckerberg បានជួបជាមួយលោកអតីតប្រធានាធិបតីអាមេរិច Obama ដើម្បីស្រស់ស្រូបអាហារពេលល្ងាចដោយមានមនុស្សល្បីៗមួយចំនួន និងលោក Steve Job ដែលជាស្ថាបនិករបស់ Apple ផងដែរ។
នៅក្នុងឆ្នាំ២០១២ Mark បានរៀបការជាមួយមិត្តស្រីរបស់គាត់ដែរបានស្គាល់គ្នាតាំងពីលោកបានរៀននៅសាកលវិទ្យាល័យ Harvard ជាមួយគ្នាគឺ លោកស្រី Priscilla Chan។ ហើយនៅក្នុងឆ្នាំ២០១២ នេះហ្វេសប៊ុកបានទិញ Instagram ក្នុងតម្លៃ ១ពាន់លានដុល្លា និងបានទិញកម្មវិធីផ្ញើសារតាមទូរស័ព្ទ(WhatApp) ក្នុងតម្លៃ ១៩ពាន់លានដុល្លាផងដែរ។
នៅក្នុង ឆ្នាំ២០១៤ ហ្វេសប៊ុកបានប្រែមុខមាត់ដោយមានអ្នកប្រើប្រាស់ប្រចាំខែរហូតដល់ទៅ ១.២៣ពាន់លានអ្នកជារៀងរាល់ខែ។ អ្នកប្រើប្រាស់រាប់ពាន់លាននាក់បានចូលប្រើបណ្តាញសង្គមនេះតាមរយៈទូរស័ព្ទដៃរបស់ពួកគេ ដោយពិភពលោកបានផ្លាស់ប្តូរប៉ុន្តែហ្វេសប៊ុកនៅតែបន្តកើនឡើងនៃអ្នកប្រើប្រាស់។
តាំងពីឆ្នាំ២០១៥ ដល់ ២០១៧ ហ្វេសប៊ុកបានធ្វើការកែទម្រង់កម្មវិធីរបស់ខ្លួនអោយកាន់តែប្រសើរឡើង និងមានសុវត្ថិភាពជាងមុនសម្រាប់អ្នកប្រើប្រាស់។
បើយើងគិតមកដល់ខែកក្កដា ឆ្នាំ២០១៨នេះ លោក Mark Zuckerberg បានក្លាយជាមហាសេដ្ឋីលេខ៣ នៅលើពិភពលោក ដោយមានសាច់ប្រាក់សរុបចំនួន ៨១.៦ ពាន់លានដុល្លារ។
យើងសូមបញ្ជាក់ថាព័ត៍មានខាងលើនេះយើងគ្រាន់តែដកស្រង់តែព្រឹត្តិការណ៍សំខាន់ៗតែប៉ុណ្ណោះ!