សម្រាប់បងប្អូនមួយចំនួនធំ គាត់តែងតែ ប្រើពាក្យ Internet ជំនួសអោយ World Wide Web ឬ ពេលខ្លះប្រើពាក្យ World Wide Web ជំនួសអោយ ពាក្យ Internet នេះក៏ព្រោះតែ ពួកគាត់ ពុំទាន់ យល់ច្បាស់ និង បែងចែក អោយដាច់ នៅឡើយទេ។ នៅថ្ងៃនេះ និស្សិតនឹងជ្រាបច្បាស់ពីភាព ខុសគ្នារវាង Internet និង World Wide Web។
ប្រព័ន្ធ World Wide Web ឬ WWW ជាប្រព័ន្ធមួយដែលមានភាពដាច់គ្នាស្រឡះពី Internet ។ World Wide Web (WWW) ត្រូវបានរកឃើញដោយលោក Tim Berners Lee នៅថ្ងៃទី ១២ ខែ មីនា ឆ្នាំ ១៩៨៩ និងត្រូវបានបង្ហាញជាសកលប្រមាណជាង ៣០ ឆ្នាំមកហើយដោយក្រុមហ៊ុន NeXT computer របស់សហរដ្ឋអាមេរិក។ វាជាប្រព័ន្ធមួយដែលផុសឡើងនៅក្នុងលំហនៃប្រព័ន្ធអ៊ិនធរណិត ហើយត្រូវបានមនុស្សគ្រប់គ្នាហៅថា វេបសាយ (WWW) ។
Internet គឺជារចនាសម្ព័ន្ធ នៃការតភ្ជាប់គ្នា រវាងកុំព្យូទ័រ ជាច្រើន នៅជុំវិញ ពិភពលោក ឬក៏អាច និយាយ បានថា Internet គឺជាវិធីសាស្រ្ត តភ្ជាប់ បណ្តាញ Network ដ៏មួយ ដើម្បីចែករំលែក ព័ត៌មាន អោយគ្នា ទៅវិញទៅមក តាមរយៈ ប្រូតូកូល ណាមួយ ហើយ កុំព្យូទ័រដែល នៅក្នុង បណ្តាញនោះ អាចប្រើខ្សែ ឬ មិនប្រើខ្សែ អាស្រ័យ ទៅតាម ជំនាន់នៃ បច្ចេកវិទ្យា។
ដោយឡែក សម្រាប់ពាក្យថា World Wide Web វិញ មានន័យថា ជាប្រភេទ ឯកសារ ដែលដាក់ បង្ហាញនៅលើ Webpage មានដូចជា អត្ថបទ សម្លេង វីដេអូ តំណរភ្ជាប់ ជាដើម ដែលជាការ រៀបចំរបស់ ក្រុមអ្នក បង្កើតវ៉ិបសាយ ដើម្បីបង្ហោះ អោយអ្នកដទៃ នៅជុំវិញ ពិភពលោក បានឃើញ តាមរយៈការប្រើប្រាស់ Browser មួយចំនួន ដូចជា Firefox, Chrome និង Internet Explorer ជាដើម។
ម្យ៉ាងវិញទៀត គេក៏អាចនិយាយ បានថា Internet ជាទំនាក់ទំនង អោយស្គាល់ គ្នារវាង កុំព្យូទ័រមួយ ទៅកុំព្យូទ័រមួយ ទៀត រីឯ World Wide Web ជាទំនាក់ទំនង អោយស្គាល់គ្នា រវាង មនុស្ស និង មនុស្ស។
The World Wide Web មិនមែនជាឈ្មោះទីមួយដែលលោក Tim Berners Lee ជ្រើសរើសដាក់សម្រាប់គម្រោងរបស់លោកនោះទេ។ ដំបូងឡើយលោកបានដាក់ឈ្មោះ The World Wide Web ថា Information Mesh, Mine of Information និង Information Mine។ ប៉ុន្តែដោយឈ្មោះទាំងអស់នោះហាក់បីដូចជាមិនជាទីចាប់អារម្មណ៍ លោកក៏បានធ្វើការសម្រេចចុងក្រោយដោយជ្រើសរើសនូវឈ្មោះ The World Wide Web (WWW) ដែលប្រើរហូតដល់សព្វថ្ងៃ។
ភាពខុសគ្នារវាង The Internet និង The WWW
ប្រព័ន្ធ World Wide Web និង ប្រព័ន្ធ internet ជាប្រព័ន្ធពីរដែលដាច់ដោយឡែកពីគ្នា។ ប្រព័ន្ធ WWW ជាទីប្រមូលផ្តុំនៃការស្វែងរកនូវឯកសារ រូបថតឌីជីថល និងគំនូរជីវចល។ ចំណែកឯប្រព័ន្ធ Internet ជាបណ្ដាញតភ្ជាប់នូវឧបករណ៍អេឡិចត្រូនិចដូចជាកុំព្យូទ័រ និងទូរសព្ទ រាប់លានគ្រឿងក្នុងពេលតែមួយនិងគ្រប់ទីកន្លែង។ ប្រព័ន្ធទាំងពីរ មានទំនាក់ទំនងជាមួយគ្នាទៅវិញទៅមក ដោយប្រព័ន្ធ World Wide Web គឺជាផ្នែកមួយនៃ Internet។ ប្រព័ន្ធទាំងពីរនេះសុទ្ធតែជួយសម្រួលក្នុងការផ្ទេរទិន្នន័យទៅវិញទៅមកនៅទូទាំងពិភពលោក៕
ដូច្នេះ សូមបងប្អូនទាំងអស់ កុំយល់ ច្រលំថា ពាក្យ Internet និង World Wide Web ជាពាក្យ តែមួយអោយសោះ ព្រោះ Internet គ្រាន់តែជា វិធីសាស្រ្ត នៃការតភ្ជាប់ កុំព្យូទ័រក្នុង បណ្តាញតែ ប៉ុណ្ណោះ រីឯ World Wide Web ជាប្រភេទ ឯកសារ មានដូចជា អត្ថបទ រូបភាព សម្លេង និង វីដេអូ ក៏ដូចជា តំណរភ្ជាប់ ផងដែរ។